Mutu 17

1Zinthu izi analankhula Yesu, ndipo anakweza maso ake kumwamba nati, Atate, ola lafika; lemekezani Mwana wanu, kuti Mwana wanu akulemekezeni; 2monga Inu mwampatsa ulamuliro pa thupi lililonse, kuti onse amene mwampatsa Iye, awapatse moyo wosatha. 3Ndipo umenewu ndi moyo wosatha, kuti iwo akudziweni Inu, Mulungu1 yekhayo woona, ndi Yesu Khristu amene Inu munamtuma. 4Ndakulemekezani Inu padziko lapansi, ndatsiriza ntchito imene munandipatsa kuti ndigwire; 5ndipo tsopano ndilemekezeni Ine, Inu Atate, pamodzi ndi Inu mwini, ndi ulemelero umene ndinali nawo pamodzi ndi Inu lisanakhale dziko lapansi.

6Ndaonetsera dzina lanu kwa anthu amene munandipatsa kuchoka m’dziko lapansi. Anali anu, ndipo munawapereka kwa Ine, ndipo asunga mau anu. 7Tsopano iwo adziwa kuti zinthu zonse zimene Inu mwandipatsa ndi zanu; 8pakuti mau amene munandipatsa Ine ndawapatsa iwo, ndipo iwo awalandira, ndipo adziwadi kuti Ine ndinachokera kwa Inu, ndipo iwo akhulupilira kuti munandituma Ine. 9Ine ndipempherera zokhudza iwo; sindipempherera zokhudza dziko lapansi, koma zokhudza iwo amene mwandipatsa Ine, pakuti iwowa ndi anu, 10 (ndipo zonse zimene zili zanga ndi zanu, ndipo [zonse] zimene zili zanu ndi zanga,) ndipo ndilemekezedwa mu izo. 11Ndipo Ine sindilinso m’dziko lapansi, ndipo awa ali m’dziko lapansi, ndipo Ine ndibwera kwa Inu. Atate Woyera, asungeni awa m’dzina lanu amene mwandipatsa Ine, kuti akhale amodzi monga ife tilili ife. 12Pamene ndinali nawo ndinawasunga iwo m’dzina lanu; iwo amene munandipatsa ndinawasunga, ndipo palibe mwa iwo amene anaonongeka, kupatula mwana wa chitayiko, kuti malemba akakwaniritsidwe. 13Ndipo tsopano ndabwera kwa Inu. Ndipo zinthu izi ndilankhula m’dziko lapansi, kuti akakhale ndi chimwemwe changa mwa iwo. 14Ine ndawapatsa iwo mau anu, ndipo dziko lapansi linawada iwo, chifukwa iwo siadziko lapansi, monga Ine sindili wadziko lapansi. 15Ine sindikupempha kuti muwachotse iwo m’dziko lapansi, koma kuti muwasunge iwo ku choipa. 16Iwo siadziko lapansi, monga Ine sindili wadziko lapansi. 17Apatuleni iwo m’choonadi: mau anu ndi choonadi. 18Monga Inu mwandituma Ine m’dziko lapansi, Inenso ndawatuma iwo m’dziko lapansi; 19ndipo Ine ndadzipatula ndekha pa iwo, kuti iwonso akadzipatule m’choonadi. 20Ndipo sindipempha pa awa okha, komanso pa iwo amene akhulupilira pa Ine kudzera m’mau awo; 21kuti onse akhale amodzi, monga umo, Atate, [ali] mwa Ine, ndi Ine mwa Iye, kuti iwonso akhale amodzi mwa ife, kuti dziko lapansi likakhulupilire kuti mwandituma Ine. 22Ndipo ulemelero umene munandipatsa Ine ndawapatsa iwo, kuti akhale amodzi, monga ife tili amodzi; 23Ine mwa iwo ndi Inu mwa Ine, kuti akakhale angwiro mu umodzi [ndi] kuti mwawakonda iwo monga umo munandikonda Ine. 24Atate, [monga kwa] iwo amene Inu munandipatsa Ine, ndifuna kuti kumene Ine ndili iwonso akakhale ndi Ine, kuti akaone ulemelero umene munandipatsa Ine, kuti akaone ulemelero wanga umene Inu munandipatsa, pakuti munandikonda Ine lisanakhazikitsidwe dziko lapansi. 25Atate wolungama, — ndipo dziko lapansi silinakudziweni Inu, koma Ine ndakudziwani, ndipo awa adziwa kuti munandituma Ine. 26Ndipo Ine ndalizindikiritsa dzina lanu, ndipo ndidzalizindikiritsa; kuti chikondi chimene munandikonda nacho chikhale mwa iwo ndi Ine mwa iwo.