Mutu 4

1Ineyo, wandende mwa Ambuye, ndikudandaulirani pamenepo kuti muyende koyenera maitanidwe amene munaitanidwa nawo, 2ndi kudzichepetsa konse ndi chifatso, ndi kupilira konse, kulolerana wina ndi mzake mwa chikondi; 3kusamalitsa kusunga umodzi wa Mzimu mwa chimangiliro cha mtendere. 4[Palitu] thupi limodzi ndi Mzimu m’modzi, monganso mwaitanidwa m’chiyembekezo chimodzi cha maitanidwe anu; 5Ambuye m’modzi, chikhulupiliro chimodzi, ubatizo umodzi; 6Mulungu1 m’modzi ndi Atate wa onse, amene ali pamwamba pa onse, ndi mwa onse ndi mwa ife tonse. 7Koma kwa aliyense wa ife kwapatsidwa chisomo molingana ndi mlingo wa mphatso ya Khristu. 8Pamenepo iye anena, M’mene anakwera kumwamba, anatsogolera andende ku undende, ndipo anapereka mphatso kwa anthu. 9Koma kuti anakwera kumwamba, chimenechi ndi chiyani kutinso anatsikira ku malo otsika a dziko lapansi? 10Iye amene anatsika kuchoka kumwamba ali yemweyonso anakwera kupitilira miyamba yonse, kuti akadzaze zinthu zonse; 11ndipo iye wapereka kwa ena atumwi, ndi ena aneneri, ndi ena alaliki, ndi ena abusa ndi ena aphunzitsi, 12kuti ankonzere oyera mtima; ndi malingaliro a ntchito ya utumiki, ndi malingaliro omangilira thupi la Khristu; 13kufikira tonse titafika pa umodzi wa chikhulupiliro ndi chidziwitso cha Mwana wa Mulungu2, ku uthunthu wa munthu wamkulu, ku muyeso wa msinkhu wa chidzalo cha Khristu; 14cholinga kuti ife tisakhalenso makanda, ogwedezekagwedezeka ndi kutengeka ndi mphepo zonse za chiphunzitsocho [chimene chili] mu chinyengo cha anthu, m’kuchenjerera ndi mfundo yofuna kukonza chinthu cholakwa; 15koma pogwiritsitsa choonadi m’chikondi, ife tingathe kukula mwa iye mu zinthu zonse, amene ndi mutu, Khristu: 16kwa ameneyo thupi lonse, limangiririka pamodzi, ndi kulumikizika ndi kukowanidwa konse, molingana ndi muyeso wa kagwiridwe ntchito ka chiwalo chilichonse, kugwira ntchito mwachokha kuonjezera mamangidwe a thupilo m’chikondi.

17Pamenepo ndinena ichi, ndi kuchitira umboni mwa Ambuye, kuti musayendenso monga amitundu ena onse ayendera m’kupanda nzeru kwao, 18odetsedwa m’nzeru zawo, oyesedwa alendo m’moyo wa Mulungu3 chifukwa cha umbuli umene uli mwa iwo, pa kuumitsa mitima yawo, 19amenewo popeza sazindikiranso kuti adzipereka okha kukhumba zonyansa, kuchita chidetso chonse ndi umbombo posakhutitsidwa kuchita zonyansa. 20Koma inu simunaphunzire Khristu chotero, 21ngati munamumva iye ndipo munalangizidwa mwa iye monga mwa choonadi chili mwa Yesu; 22 [ndicho] kuvula makhalidwe anu oyamba munthu wakale amene amazinyenga yekha ku zilakolako zonyansa; 23ndi kukonzedwanso mu mzimu mwa malingaliro anu; 24ndi kuvalanso munthu watsopano, amene molingana ndi Mulungu4 analengedwa m’chilungamo choonadi ndi chiyero. 25Mwa ichi pakutaya bodza, lankhulani choonadi aliyense ndi mnasi wake, chifukwa ndife ziwalo wina ndi mzake. 26Kwiyani, ndipo musachimwe; musalole dzuwa lilowe mudakali chikwiyire, 27kapena kumpatsa mpata mdierekezi. 28Wakuba asabenso, komatu agwiritse ntchito, agwire ntchito mokhulupirika ndi manja ake, kuti akagawe kwa iwo amene ali osowa. 29Musalole mau a chinyengo atuluke pakamwa panu, koma ngati alipo akhale omangilira, kuti akapereke chisomo kwa iwo akuwamva. 30Ndipo musamvetse chisoni Mzimu Woyera wa Mulungu5, amene inu munasindikizidwa chizindikiro cha tsiku la chiombolo. 31Kupsa mtima konse, ndi ukali, ndi mkwiyo, ndi kulalata, ndi kukhadzula polankhula, zichotsedwe mwa inu, ndi kaduka yense; 32ndipo khalani okoma mtima wina ndi mzake, achifundo, okhululukirana wina ndi mzake, monganso Mulungu6 mwa Khristu anakukhululukirani inu.