Mutu 4

1Ambuye inu, perekani kwa akapolo chimene chili cholungama ndi choyenera, podziwa kuti inunso muli naye Mbuye m’mwamba.

2Pilirani m’pemphero, pakuyang’anira ilo ndi chiyamiko; 3kutipemphereranso ife nthawi yomweyo, kuti Mulungu1 atitsegulire ife khomo la mau kulankhula chinsinsi cha Khristu, chimenenso ine ndinamangidwa nacho, 4mapeto ake kuti ine ndikachionetsere monga ndinafuna kulankhula.

5Yendani mu nzeru kwa iwo amene ali kunja, pogwiritsa mwayi otere. 6Lolani mau anu nthawi zonse akhale a chisomo, okometsera ndi mchere, kotero kuti mukadziwe momwe mukhoza kuyankhirana wina ndi mzake.

7Tukiko, m’bale wokondedwayo komanso mtumiki wokhulupirika ndi kapolo mzanga mwa Ambuye, akudziwitsani inu zimene zikundisautsa; 8ameneyo ndamtumiza kwa inu pa cholinga chake chomwechi, kuti akadziwe zokusautsani, ndi kuti akakulimbikitseni m’mitima mwanu: 9pamodzi ndi Onesimo, m’bale wokondedwa ndi wokhulupilira, amene ali m’modzi wa inu. Iwowa azakudziwitsani zonse za kuno.

10Aristarko mkaidi mzanga akukulonjerani, ndi Marko, msuwani wa Barnaba, amene kwa iye munalandira malamulo, (ngati afika kwa inu mlandireni,) 11komanso Yesu wotchedwa Yusto, amene ali wa kumdulidwe. Amenewa ndiwo antchito amzanga okhawo mu ufumu wa Mulungu2 amene akhala chitonthonzo kwa ine. 12Epafra, amene ndi m’modzi wa inu, kapolo wa Khristu Yesu, akukulonjerani, nthawi zonse mkulimbika kukuikizani m’mapemphero, kufikira mapeto kuti mukaime opanda banga ndi aphumphu mu zonse m’chifuniro cha Mulungu3. 13Pakuti ine ndimchitira umboni kuti agwiritsa ntchito kwambiri chifukwa cha inu, ndi iwo a m’Laodikaya, ndi iwo a m’Herapoli. 14Luka, sing’anga wokondedwa, akukulonjerani, ndi Dema. 15Alonjereni abale m’Laodikaya, ndi Numfa, ndi mpingo umene uli mnyumba. 16Ndipo pamene kalatayi yawerengedwa pakati panu, onetsetsani kuti iwerengedwenso mu mpingo waku Laodikaya, ndi kuti inunso muwerenge yochokera ku Laodikaya. 17Ndipo lankhulani kwa Arkipo, Samalira utumiki umene unalandira mwa Ambuye, kuti ukaukwaniritse kufikira kumapeto. 18 Malonje ndi dzanja la ine Paulo. Kumbukirani nsinga zanga. Chisomo chikhale ndi inu.