Mutu 5

1Khristu watimasula ife mu ufulu; pamenepo chilimikani, ndipo musamangidwenso mu goli la ukapolo. 2Taonani ine Paulo, ndinena kwa inu, kuti ngati muli odulidwa, Khristu simudzapindula naye kanthu. 3Ndipo ndichitiranso umboni kwa munthu wina aliyense amene ali wodulidwa, kuti ali nayo ngongole ya kuchita lamulo lonse. 4Mwakanizidwa ku phindu lonse lochokera kwa Khristu monga wolekanitsidwa naye, monga ochuluka alungamitsidwa mwa lamulo; munagwa posiyana nacho chisomo. 5Pakuti ife mwa Mzimu, kuchokera pa mfundo ya chikhulupiliro, tidikilira chiyembekezo cha chilungamo. 6Pakuti mwa Khristu Yesu kaya kudulidwa kapena kusadulidwa kulibe mphamvu; koma chikhulupiliro chakuchita mwa chikondi. 7Munathamanga bwino; ndani anakuletsani inu kuti musamvere choonadi? 8Makopedwe amene sakuchokera kwa iye amene anakuitanani inu. 9Chotupitsa mkate chochepa chimatupitsa mtanda wonse. 10Ine ndikhulupilira inu mwa Ambuye, kuti simukhala nawo malingaliro ena; ndipo iye amene azunza inu azitengera kutsutsika pa ichi, angakhale ali yani.

11Komatu abale, ngati ndilalikira mdulidwe, chifukwa chiyani ndikuzunzidwabe? Pamenepo chikhumudwitso cha mtanda chidatha. 12Ndikhumbitsa kuti iwo akaziduledule okha iwo amene akuponyani inu m chisokonekero. 13Pakuti mwayitanidwa ku ufulu, abale inu; musasandutse ufulu wanu kukhala chopindulitsa cha thupi, komatu mwa chikondi tumikiranani wina ndi mzake. 14Pakuti lamulo lonse likwaniritsidwa m mau amodzi, kuti Uzikonda mzako monga uzikondera iwe mwini; 15koma ngati mulumana ndi kudyana wina ndi mzake, onetsetsani kuti musadyane wina ndi mzake.

16Koma ine ndinena, Yendani ndi Mzimu, ndipo simudzakwaniritsa chilakolako cha thupi. 17Pakuti zilakolako za thupi zimatsutsana ndi Mzimu: ndipo zinthu izi zimatsutsana china ndi chinzake, kuti musakachite zinthu zimene mukhumba; 18koma ngati mutsogozedwa ndi Mzimu, simulinso pansi pa lamulo. 19Tsopano ntchito za thupi zionekera, ndizo dama, chidetso, kukhumba zonyansa, kupembedza mafano, 20matsenga, udani, mkwiyo, nsanje, kupsa mtima, kutetana, mikangano, kulosera, 21kaduka, kupha, kuledzera, mchezo, ndi zinthu ngati izi; monga ndinakuuzani poyamba, monganso ndinanena kale, kuti iwo akuchita zinthu zoterezi sadzalowa ufumu wa Mulungu1. 22Koma chipatso cha Mzimu ndicho chikondi, chimwemwe, mtendere, kupilira, kukoma mtima, ubwino, chikhulupiliro, 23chifatso, kudziletsa: pokana zimenezi palibe lamulo. 24Koma iwo amene ali a Khristu anapachika thupi ndi zokonda zake ndi zilakolako zake. 25Ngati tikhala mwa Mzimu, tiyeni tiyendenso mwa Mzimu. 26Tisakhale odzikuza, kuputana wina ndi mzake, kuchitirana njiru wina ndi mzake.