Mutu 6

1Abale, ngatinso munthu agwidwa nako kulakwa, inu amene muli a uzimu m’bwezeni wotereyu ndi mzimu wodzichepetsa, poziganizira nokha kuti nanunso mungayesedwe.

2Nyamuliranani zothodwetsa, ndipo pamenepo mukwaniritse lamulo la Khristu. 3Pakuti ngati munthu azitamandira yekha kuti ali kanthu, pokhala ali chabe, adzinyenga yekha; 4komatu aliyense aziyese ndi ntchito zake, ndipo pamenepo adzazitamandira mu zimene zikupezeka mwa iye yekha, ndipo osati mu zimene zikupezeka mwa wina. 5Pakuti aliyense adzanyamula zothodwetsa zake.

6Amene aphunzitsidwa m’mau alumikizidwa ndi iye amene amaphunzitsa mu zinthu zonse zabwino.

7Musanyengeke: Mulungu1 sanyozeka; pakuti chilichonse chimene munthu afesa, chomwechonso adzatuta. 8Pakuti amene afesa monga mwa thupi lake lomwe, adzakolola chivundi cha kuthupi; koma iye amene afesa monga mwa Mzimu, mwa Mzimu adzakolola moyo wosatha: 9koma tisafooke pakuchita zabwino; pakuti mu nthawi ina, ngati sitifooka, tidzakolola. 10Chomwecho tsopano, monga tili nayo nyengo, tiyeni tichite zabwino kwa onse, makamaka kwa iwo a m’banja la chikhulupiliro.

11Taonani kalata yayitali iyi imene ndakulemberani inu ndi manja anga. 12Ambiri amafunisitsa kukhala owoneka bwino m’thupi, amenewa amakukakamizani inu kuti mudulidwe, chokhacho kuti asakazunzidwe chifukwa cha mtanda wa Khristu. 13Pakuti ngakhale iwo amene adulidwa okha asunga lamulo; koma iwo afunisitsa kuti inu mudulidwe, kuti akazitamandire m’thupi lanu. 14Koma zisiyana ndi ine kuti ndizitamandira kokha mu mtanda wa Ambuye wathu Yesu Khristu, mwa amene dziko lapansi linapachikidwa kwa ine, ndi ine kudziko lapansi. 15Pakuti mwa Khristu Yesu kaya kudulidwa kapena kusadulidwa kulibe phindu; koma kulengedwanso kwatsopano. 16Ndipo ambiri amene ayenda monga mwa lamulo limeneli, mtendere ukhale pa iwo ndi chifundo, ndi pa Israyeli wa Mulungu2.

17Kuyambira pano aliyense asandivutitse ine, pakuti mthupi mwanga ndili nayo mikwingwirima ya Ambuye Yesu. 186Chisomo cha Ambuye wathu Yesu Khristu chikhale ndi mzimu wanu, abale. Amen.