Mutu-2

1Pamenepo patapita zaka khumi ndi zinayi ndinapitanso ku Yerusalemu ndi Barnaba, ndinamtenganso Tito; 2ndipo ndinapitako molingana ndi vumbulutso, ndipo ndinawalalikira uthenga wabwino umene ndinalalikira pakati pa amitundu, koma mwa nseri kwa iwo otchuka [pakati pawo], kuti mwina mwanjira iliyonse ndisathamange pachabe; 3(komatu ngakhale Tito, amene anali nane, pokhala Mhelene, sanamkakamize kuti adulidwe;) 4ndipo pachifukwa cha abale achinyengo olowezedwa mseri, amene anabwera mwachinsinsi kuzazonda ufulu wathu umene tili nawo mwa Khristu Yesu, kuti atibweretse ife mu ukapolo; 5kumene sitinagonjere ngakhale kwa ola limodzi, kuti choonadi cha uthenga wabwino chikakhalebe ndi inu. 6Koma kwa iwo akudziyesa ngati ali kanthu — kaya anali otani, sizibweretsa kusintha kulikonse kwa ine: Mulungu1 samalandira maonekedwe a munthu; pakuti kwa ine iwo amene anali otchukawo sanapindule kanthu; 7koma mosiyana, poona kuti uthenga wabwino wa osadulidwa unaikidwa mwa ine, ngakhalenso kwa Petro kunaikidwa uthenga wa odulidwa, 8 (pakuti Iye wakuchita mwa Petro pa utumwi wa odulidwa achitanso chomwecho mwa ine pa amitundu,) 9ndipo poona chisomo choperekedwa kwa ine, Yakobo ndi Kefa ndi Yohane, amene anali odziwika kukhala monga nsanamila, anandipatsa ine ndi Barnaba dzanja lamanja la chiyanjano, kuti ife [tipite] kwa amitundu, ndipo iwo kwa odulidwawo; 10kungoti tikuyenera kukumbukira osauka, chinthu chimenenso ine ndinafulumira kuchichita.

11Koma pamene Petro anafika ku Antiokeya, ndinatsutsana naye pamaso pake, chifukwa anayenera kudzudzulidwa: 12pakuti poyamba anafika ena ochokera kwa Yakobo, anadya pamodzi ndi iwo amitundu; koma pamene iwo anabwera, anabwerera m’mbuyo nadzipatula, naopa iwo amene anali a mdulidwe; 13ndipo Ayuda enanso anagwiranso m’maso pamodzi naye; kotero kuti ngakhale Barnaba anatengekanso ndi kuphimba m’maso kwao. 14Koma pamene ndinaona kuti sakuyenda molongosoka, molingana ndi choonadi cha uthenga wabwino, ndinati kwa Petro pamaso pa iwo onse, Ngati inu, okhala Ayuda, mukhala ngati amitundu ndipo osati ngati Ayuda, mudzawakopa bwanji amitundu ku Chiyuda? 15Ife, Ayuda mwa chibadwidwe, ndipo osati ochimwa amitundu, 16koma podziwa kuti munthu samalungamitsidwa pa mfundo ya ntchito za lamulo, koma mwa chikhulupiliro cha Yesu Khristu, ifenso takhulupilira mwa Khristu Yesu, kuti tikalungamitsidwe pa mfundo ya chikhulupiliro cha Khristu; ndipo osati mwa ntchito za lamulo; chifukwa cha mfundo ya ntchito ya lamulo palibe thupi limene lizalungamitsidwa. 17Tsopano ngati pofuna kuti tilungamitsidwe mwa Khristu ifenso tapezeka ochimwa, kodi pamenepo Khristu wakhala mtumiki wa uchimo? Musaganize choncho. 18Pakuti ngati zinthu zimene ndinazigwetsa, zimenezi ndizimanganso, ndikuzitsimikizira ndekha kuti ndine wochimwa. 19Pakuti ine, mwa lamulo, ndinafa ku lamulo, kuti ndikhale ndi moyo mwa Mulungu2. 20Ine ndinapachikidwa mwa Khristu, ndipo sindikhalanso ndi moyo, koma Khristu akhala ndi moyo mwa ine; ndipo mu chimenechi ndikhala m’thupi, ndikhala mwa chikhuIupiliro, chikhulupiliro cha Mwana wa Mulungu3, amene anandikonda ine nadzipereka yekha chifukwa cha ine. 21Sindichiyesa chabe chisomo cha Mulungu4; pakuti ngati kulungama kuli kwa lamulo, pamenepo Khristu anafa popanda phindu.