Mutu-2

1Ngati pamenepo muli chitonthonzo chilichonse mwa Khristu, ngati muli chitonthozo chilichonse cha chikondi, ngati muli chiyanjano chilichonse cha Mzimu, ngati muli chifundo ndi kukoma mtima kulikonse, 2kwaniritsani chimwemwe changa, kuti mukaganizire chinthu chomwecho, kukhala nacho chikondi chomwecho, kukhala m’moyo wolumikizana, kuganizira chinthu chimodzi; 3Musachite kanthu mu mzimu wa makangano kapena ulemelero wopanda nawo phindu, komatu, m’kudzichepetsa kwa malingaliro, aliyense amutenge mzake kukhala woposa iye mwini; 4aliyense asapenyerere za iye yekha, koma aliyense apenyererenso za mzake. 5Pakuti malingaliro awa akhale mwa inu amenenso anali mwa Khristu Yesu; 6ameneyo pokhala nawo maonekedwe a Mulungu1, sanachiyese chinthu cholanda kukhala wofanana ndi Mulungu2; 7koma anadzikhuthula yekha, natenga maonekedwe a kapolo, natenga malo ake nakhala monga maonekedwe a anthu; 8ndipo popezedwa mthupi monga munthu, anadzichepetsa yekha, nakhala womvera kufikira imfa, ndiyo imfa ya pamtanda. 9Mwa ichinso Mulungu3 anamukweza iye, ndipo anampatsa iye dzina, limene lili pamwamba pa maina onse, 10kuti padzina la Yesu bondo lililonse lipinde, la zam’mwamba ndi dziko lapansi ndi zapansi pa dziko, 11ndipo lilime lililonse livomereze kuti Yesu Khristu ndi Ambuye ku ulemelero wa Mulungu4 Atate.

12Cholinga kuti, okondedwa anga, ngakhale monga mwakhala muli omvera, osati pokhapo pamene ine ndili pakati panu, koma tsopano pamene ine sindili pakati panu, gwirani ntchito ya chipulumutso chanu ndi mantha komanso kunjenjemera, 13pakuti ali Mulungu5 amene amagwira ntchito mwa inu pakufuna ndi kugwira ntchito molingana ndi chifuniro chake chabwino. 14Chitani zinthu zonse mosanyinyirika ndi makani, 15kuti mukakhale osalakwa ndi ozichepetsa, ana opanda banga a Mulungu6 opezeka pakati pa m’badwo wokhotakhota ndi wopotoka; amene mwa iwo munaonekera ngati kuwala m’dziko lapansi, 16kugwiritsitsa mau a moyo, kuti ndikhale nacho chozitamandira m’tsiku la Khristu, kuti sindinathamange kwachabe kapena kugwiritsa ntchito pachabe. 17Komanso ngati ndithiridwa pa nsembe ndi pa utumiki wa chikhulupiliro chanu, ine ndikondwera, ndipo ndikondwera pamodzi ndi inu nonse. 18Momwemonso inu mukondwera, ndi kukondwera ndi ine. 19Koma ndiyembekezera mwa Ambuye Yesu kuti ndidzatumiza Timoteyo kwa inu posachedwapa, kuti inenso nditonthozedwe, kudziwa m’mene inu mukhalira. 20Pakuti ndilibe wina wolingana naye malingaliro amene akhoza kusamalira ndi kukhudzika kwenikweni m’mene inuyo mukhalira. 21Pakuti onsewa afuna zinthu zawo, osati zinthu za Yesu Khristu. 22Koma inu mudziwa matsimikizidwe a iye, kuti, monga mwana achitira kwa tate wake, watumikira pamodzi ndi ine mu ntchito ya uthenga wabwino. 23Ameneyu ndiyembekezera kumtumiza mwachangu, potengera m’mene ndingaonere kuti zili motani ndi ine: 24koma ndikukhulupilira mwa Ambuye kuti ine mwini ndidzabweranso posachedwa; 25koma ndachiona chanzeru kukutumizirani Epafridito, m’bale wanga ndi wantchito mzanga komanso msilikali mzanga, komatu wokutumikirani inu komanso mtumiki wa zosowa zanga, 26pakuti iye wakhala ndi chikhumbokhumbo chofuna kukuonani inu nonse, ndipo munali okhudzika pakumva kuti iye amadwala; 27pakuti anadwala kutsala pang’ono kufa, koma Mulungu7 anamchitira chifundo, ndipo osati pa iye yekha, komanso pa ine, kuti ndisakhale ndi chisoni pamwamba pa chisoni china. 28Ndamtumiza pamenepo mwachangu, kuyi pakumuona iye mukhalenso ndi chimwemwe, ndi kuti inenso ndikhale ndi chisoni chochepa. 29Mlandireni iye pamenepo mwa Ambuye ndi chimwemwe chonse, ndi kuchitira ulemu oterewa; 30 chifukwa cha ntchito imene inatsala pang’ono kumutengera ku imfa, kupereka moyo wake kuti akakwaniritse chimene chimasowekera mu utumiki wanu kwa ine.