Mutu 6

1Ana inu, mverani makolo anu mwa Ambuye, pakuti uku ndiko kulungama. ?2Lemekeza atate wako ndi amako, limeneli ndilo lamulo loyamba lokhala nalo lonjezano, 3kuti zikhale bwino ndi iwe, ndi kuti ukakhale nthawi yaitali padziko lapansi. 4Ndipo inu atate, musakwiyitse ana anu, koma aleleni m’chilangizo ndi kuwaphunzitsa mwa Ambuye.

5Akapolo inu, mverani ambuye wanu monga mwa kuthupi, ndi mantha ndi kunjenjemera, m’kudzichepetsa konse m’mitima mwanu monga kwa Khristu; 6simonga kutumikira pamaso monga mwa kukondweretsa anthu; koma monga akapolo a Khristu, kuchita chifuniro cha Mulungu1 kuchokera mu mtima, 7kutumikira ndi cholinga chabwino monga kwa Ambuye, ndipo osati kwa anthu; 8podziwa kuti chilichonse chabwino chimene munthu adzachita, chomwechi adzachilandira kwa Ambuye, kaya ndi kapolo kapena mfulu. 9Ndipo, ambuye inu, chitani chimodzimodzi kwa iwo, osawaopseza, podziwa kuti Ambuye wa inu nonse awiri ali kumwamba, ndipo palibe tsankho ndi iye.

10Chotsalira, abale, khalani olimba mwa Ambuye, ndi kulimbika mu mphamvu yake. 11Valani zida zonse za Mulungu2, kuti mukakwanitse kulimbana ndi machenjerero a mdierekezi: 12chifukwa kulimbana kwathu sitilimbana nawo mwazi ndi thupi, komatu tilimbana nawo maukulu ndi maulamuliro, kulimbana ndi akuchita zolimbika a dziko lapansi mdima uno, kulimbana ndi [mphamvu] za uzimu zoipa m’zakumwamba. 13Pachifukwa chimenechi valani zida za Mulungu3, kuti mukakwanitse kuyimabe mu tsiku loipa, ndipo, mutakwaniritsa zinthu zonse, mudzachilimika. 14Chomwecho chilimikani, mutadzimangira m’chiuno ndi choonadi, ndipo mutavala cha pachifuwa cha chilungamo, 15ndi kuveka mapazi anu ndi chikonzekero cha uthenga wabwino wa mtendere: 16pambali pa zonsezi, mutatenga chishango cha chikhulupiliro chimene mungathe kuzimitsira mivi yonse ya moto ya woipayo. 17Mutavalanso chisoti cha chipulumutso, ndi lupanga la Mzimu, limene lili mau a Mulungu4; 18kupemphera nyengo zonse, mwa pemphero lonse ndi pembedzero mu Mzimu, ndi kupenyerera mu zinthu zimenezi ndi kupilira konse ndi kupembedzera oyera mtima onse; 19ndipo kwa ine kuti cholankhula chikaperekedwe kwa ine m’kutsekula pakamwa panga kudziwitsa ndi chilimbiko chonse chinsinsi cha uthenga wabwino, 20umene ine ndili kazembe [womangidwa] ndi unyolo, kuti ndikakhale wolimba mtima m’menemo monga ndifunira kulankhula.

21Koma kuti nanunso mudziwe zokhudza ine, m’mene ndikukhalira, Tukiko, m’bale wokondedwayo ndiye mtumiki wokhulupirika mwa Ambuye, akudziwitsani inu zinthu zonse; 22ameneyu ndamtumiza kwa inu pa chinthu chomwechi, kuti mukadziwe zimene zikutichitikira ndi kuti akalimbikitse mitima yanu.

23Mtendere ukhale kwa abale, ndi chikondi ndi chikhulupiliro, zochokera kwa Mulungu5 atate ndi Ambuye Yesu Khristu. 24Chisomo kwa iwo onse amene akonda Ambuye wathu Yesu Khristu mopanda chinyengo.