Mutu 18

1Ndipo zitapita zinthu izi, atachoka ku Atene, iye anafika ku Korinto; 2ndipo anapeza Myuda wina dzina lake Akula, wa fuko la Ponto, amene anangofika kumene kuchokera ku Italiya, pamodzi ndi mkazi wake Priskila, (chifukwa Klaudiyo analamula kuti Ayuda onse achoke ku Roma,) anabwera kwa iwo, 3ndipo chifukwa iwo anali kuchita malonda ofanana ndi iwo, komanso ntchito yofanana. Pakuti iwowa ntchito yawo inali yosoka ndi kugulitsa mahema. 4Ndipo iye amawafotokozera m’sunagoge lasabata lililonse, kuwakopa Ayuda ndi Ahelene. 5Ndipo pamene Sila ndi Timoteo anatsikira kuchokera ku Makedoniya, Paulo anapsinjika pokhudza mauwo, kuchitira umboni Ayuda kuti Yesu anali Khristu. 6Koma pamene iwo anatsutsa ndi kulankhula mwachipongwe, iye anasatsa zovala zake, nati kwa iwo, Mwazi wanu ukhale pamutu panu: Ndine wopanda banga; kuchokera kuno ine ndipita kwa amitundu. 7Ndipo pamene anachoka kumeneko iye anafika kunyumba kwa [munthu] wina, dzina lake Yusto, amene amalambira Mulungu1, amene nyumba yake inaphatikana ndi sunagoge. 8Koma Krispo mkulu wa sunagoge anakhulupilira Ambuye pamodzi ndi banja lake lonse; ndipo ambiri a Akorinto pakumva, anakhulupilira, ndipo anabatizidwa. 9Ndipo Ambuye anati kwa Paulo mwa masomphenya usiku, Usachite mantha, koma lankhula ndipo usakhale chete; 10chifukwa ine ndili ndi iwe, ndipo palibe amene adzaika dzanja pa iwe ndi kukupweteka; chifukwa ndili nawo anthu ochuluka mu mzinda uwu. 11Ndipo iye anakhalabe [kumeneko] chaka chimodzi ndi miyezi isanu ndi umodzi, kuphunzitsa mau a Mulungu2 pakati pawo. 12Koma pamene Galiyo anali chiwanga cha Akaya, Ayuda ndi mtima umodzi anamuukira Paulo ndipo anampititsa ku mpando wa chiweruzo, 13nanena, [Munthu] uyu amakopa anthu kulambira Mulungu3 mosemphana ndi lamulo. 14Koma pamene Paulo amati azitsegula pakamwa pake, Galiyo anati kwa Ayudawo, Kukadakhaladi kuti ndi kulakwika kapena mlandu, Ayuda inu, monenetsa ine ndikanakumverani inu; 15koma ngati nkhani yake ndi yokhudza mau, ndi maina, ndi lamulo limene muli nalo, zionereni nokha; [pakuti] Ine sindikufuna kukhala oweruza pa zinthu izi. 16Ndipo iye anawathamangitsa iwo pa mpando wa chiweruzo. 17Ndipo pamene iwo onse anamgwira Sostene mkulu wa sunagoge, anam’menya iye pa mpando wa chiweruzo. Ndipo Galiyo sizinamkhudze zinthu zimenezi. 18Ndipo Paulo, pamene anakhala [kumeneko] masiku ambiri, anawasiya abale nakwera ngalawa kupita ku Suriya, ndipo anapita naye Priskila ndi Akula, atameta m’mutu mwake m’Kenkreya, pakuti anachita pangano; 19ndipo iye anafika ku Efeso, ndipo iye anawasiya iwo kumeneko. Koma pamene amalowa yekha m’sunagoge anatsutsana ndi Ayuda. 20Ndipo pamene iwo anamupempha iye kuti akhalebe nawo kwa nthawi yaitali sanavomereze, 21koma anawatsanzika iwo, nanena, [Ndikuyenera ndithu mwa mtundu ulionse kusunga phwando limene likubwera ku Yerusalemu]; Ine ndidzabweranso kwa inu, ngati Mulungu4 afuna: ndipo iye anakwera ngalawa kuchoka ku Efeso. 22Ndipo pamene anafika ku Kaisareya, ndipo anakwera kumeneko kukalonjera mpingo, natsikira ku Antiokeya. 23Ndipo pamene anakhala kumeneko kwa kanthawi, anachokako, nayenda kudutsa dziko la Galatiya ndi Frugiya, kuwakhazikitsa ophunzira onse.

24Koma Myuda wina, dzina lake Apolo, wa fuko la Alesandreya, munthu wodziwa kulankhula mwa nzeru, amene anali wa mphamvu m’malemba, anafika ku Efeso. 25Iye analangizidwa m’njira ya Ambuye, ndipo pokhala nacho changu mu mzimu wake, analankhula ndi kuphunzitsa chimodzimodzi zinthu zokhudza Yesu, pongodziwa chabe ubatizo wa Yohane. 26Ndipo iye anayamba kulankhula molimba mtima m’sunagoge. Ndipo Akula ndi Priskila, pamene anamumva iye, anamtengera kwa [iwo] ndipo anatambasulira kwa iye njira ya Mulungu5 mwachindunji. 27Ndipo pamene iye anafuna kupita m’Akaya, abale analembera kalata ophunzira kuwapempha kuti amlandire, ameneyo, pobwera, anathandizira kwambiri abale amene anakhulupilira mwa chisomo. 28Pakuti iyeyu ndi mphamvu yaikulu anawakopa Ayuda pagulu, powaonetsa m’malemba kuti Yesu anali Khristu.